ທະນາຄານຮ່ວມພັດທະນາ ເປີດໂຕຜະລິດຕະພັນ JDB Yes ແລະ ປະຕິທິນ 2018 (16-01-2018)

 

ທະນາຄານຮ່ວມພັດທະນາ ເປີດໂຕຜະລິດຕະພັນ JDB Yes ແລະ ປະຕິທິນ 2018

ທະນາຄານຮ່ວມພັດທະນາ ໄດ້ປັບປຸງ ແລະ ພັດທະນາຜະລິດຕະພັນໃໝ່ ອອກມາຢ່າງຕໍ່ເນື່ອງ ເພື່ອອຳນວຍຄວາມສະດວກໃຫ້ແກ່ລູກຄ້າສາມາດເຮັດທຸລະກຳທາງດ້ານການເງິນດ້ວຍຕົນເອງ ຜ່ານສະມາດໂຟນ ໂດຍບໍ່ຈຳເປັນເຂົ້າທະນາຄານ. ຫຼ້າສຸດໃນວັນທີ 12 ມັງກອນ ທີ່ຜ່ານມາ ໄດ້ເປີດໂຕປະຕິທິນ 2018 ແລະ ຜະລິດຕະພັນ JDB Yes ທີ່ສຳນັກງານໃຫຍ່.

JDB yes ເປັນຜະລິດຕະພັນໃໝ່ຂອງ ທະນາຄານຮ່ວມພັດທະນາ ທີ່ມີຄວາມທັນສະໄໝ ໄດ້ມາດຕະຖານສາກົນ, ເປັນແອັບພຣີເຄຊັນທີ່ສາມາດດາວໂຫຼດມາຕິດຕັ້ງດ້ວຍຕົນເອງ ໂດຍສາມາດເຮັດໄດ້ດັ່ງນີ້: ໂອນເງິນຜ່ານເລກບັນຊີ, ຊຳລະບິນລາວໂທລະຄົມ, ອີທີແອວ, ນ້ຳປະປາ, ເຕີມເງິນລາວໂທລະຄົມ, ອີທີແອວ, ຊຳລະບັດ Credit, ເບິ່ງລາຍການເຄື່ອນໄຫວການນຳໃຊ້ບັດ Credit, ໂອນເງິນຜ່ານໝາຍເລກໂທລະສັບ P2P, ທວງໜີ້ Pay me ແລະ ລ໋ອກບັດ Credit, ບັດ ATM ຕາມມາດຕະຖານສາກົນ ໄດ້ຮັບໃບຢັ້ງຢືນ ISO 9001:2015 ໃນດ້ານການບໍລິການ ໃນປີທີ່ຜ່ານມາ ແລະ ກຳລັງພັດທະນາໃຫ້ກາຍເປັນລະບົບ Digital ເທື່ອລະກ້າວ.

ພ້ອມດຽວກັນນີ້ຍັງໄດ້ມີການເປີດໂຕປະຕິທິນປະຈຳປີ 2018  ເຊິ່ງເປັນປີພິເສດທີ່ໄດ້ມີການຮ່ວມມືກັບ ນາງສາວລາວ 2017, Miss Grand Lao 2017, Miss International Laos 2017, Miss Supranational Lao 2017, Miss Universe Lao  2017 ທີ່ JDB ໄດ້ຮ່ວມເປັນຜູ້ອຸປະຖຳຫຼັກ ໃນການປະກວດນາງສາວຕ່າງໆ ທີ່ຊະນະການປະກວດຈະໄດ້ເປັນນາງແບບຖ່າຍປະຕິທິນ ເພື່ອແຈກຢາຍໃຫ້ແກ່ລູກຄ້າ ແລະ ປະຊາຊົນຜູ້ທີ່ຄວາມຕ້ອງການປະຕິທິນ. ເພື່ອເປັນການສົ່ງເສີມວັດທະນະທຳ ໂດຍສະເພາະແມ່ນເຄື່ອງນຸ່ງຫົ່ມຂອງແມ່ຍິງລາວ ທີ່ມີເອກກະລັກ ໂດດເດັ່ນ ສວຍງາມ ແລະ ເພື່ອເປັນການປະຊາສຳພັນໃຫ້ສັງຄົມຮູ້ຈັກທະນາຄານຮ່ວມພັດທະນາ ແລະ ບັນດາຜະລິດຕະພັນຫຼາຍຂື້ນ ເຊິ່ງປັດຈຸບັນ ທະນາຄານຮ່ວມພັດທະນາ ໄກ້ມີໜ່ວຍບໍລິການທັງໝົດ 53 ໜ່ວຍບໍລິການໃນຂອບເຂດທົ່ວປະເທດ ເພື່ອໃຫ້ປະຊາຊົນລາວບັນດາເຜົ່າ ສາມາດເຂົ້າເຖິງແຫຼ່ງທຶນທີ່ໝັ້ນຄົງ, ເຂົ້າເຖິງການບໍລິການທາງດ້ານການເງິນທີ່ຄົບວົງຈອນ ຕາມຄຳຂວັນທີ່ວ່າ: ເຕີບໃຫຍ່ໄປພ້ອມກັນ.