ພິທີ​ເປີດ​ໂຕ​ຜະລິດ​ຕະພັນ​ໃໝ່ YES Pay (21-03-2018)

ໃນວັນທີ 19 ມີນາ 2018 ນີ້, ທີ່ສໍານັກງານໃຫຍ່ ທະນາຄານຮ່ວມພັດທະນາ (JDB) ​ໄດ້ມີພິທີ​ເປີດ​ໂຕ​ຜະລິດ​ຕະພັນ​ໃໝ່ Yes Pay ເພື່ອອໍານວຍຄວາມສະດວກໃຫ້ແກ່ການ​ຊຳລະ​ຄ່າ​ສິນຄ້າ ແລະ ບໍລິການ​ຕ່າງໆ ​ຜ່ານລະບົບແອບພຣີເຄຊັນ QR Code ຂອງ JDB Yes ໃນ​ມື​ຖື​ສະມາດ​ໂຟນ​ ໂດຍ​ບໍ່​ຈໍາເປັນຕ້ອງພົກພາເງິນສົດ.

ທ່ານ ບຸນ​ສະຫວ່າງ ພິລາ​ໄຊ​ພິທັກ ຜູ້ອຳນວຍການ​ໃຫຍ່ ກ່າວວ່າ ນີ້​ເປັນ​ຜະລິດໃໝ່​ທີ່​​ເປັນ​​ໂປຣ​​ແກຣມ ສໍາລັບໃຊ້​ຈ່າຍ​ຄ່າ​ສິນຄ້າ ແລະ ບໍລິການ​ຕ່າງໆ, ພຽງ​ແຕ່​ດາວໂຫລດ​ໂປ​ຣແກຣມດັ່ງກ່າວລົງ​ໃນ​ມືຖື, ຈາກນັ້ນສະ​ແກນ QR Code ກໍ​ສາມ​​າດຈ່າຍ​ຄ່າ​ສິນຄ້າ ແລະ ບໍລິການ ​ໄດ້​ຢ່າງງ່າຍດາຍ, ​ໂດຍ​ຈະ​ຕັດ​ເງິນ​ໃນ​ບັນຊີ​ຂອງ​ຜູ້​ຊື້​ໄປ​​ເຂົ້າບັນຊີ​ຂອງ​ຜູ້​ຂາຍ, ຖ້າ​ຍອດ​ຊຳລະ​ບໍ່​ເກີນ 5 ​ລ້ານ​ກີ​ບ ພາຍ​ໃນ 1 ​ເດືອນ ​ແມ່ນ​ບໍ່​ມີຄ່າ​ທຳນຽມ, ຖ້າ​ກາຍ 5 ​ລ້ານ​ ກີບ ກໍ​ຈະ​​ເກັບ​ຄ່າ​ທຳນຽມ​ຄັ້ງ​ລະ 2.000 ​​ກີບ.
ຜະລິດ​ຕະພັນ​ໃໝ່​ນີ້, ຈະ​​ອຳນວຍ​ຄວາມ​ສະດວກ​ໃນ​ການ​ຊຳລະ​ສະ​ສາງ​ໄດ້​ຕະຫຼອດ 24 ​ຊົ່ວ​ໂມງ, ​ໂດຍ​ບໍ່ຈຳ​ເປັນ​ຕ້ອງ​ເຂົ້າ​ໄປ​ທະນາຄານ, ບໍ່​ຈຳ​ເປັນ​ຕ້ອງ​ພົກ​ພາ​ເງິນສົດ ​ແລະ ​ປຽບ​ເໝືອນ​ທະນາຄານ​ ຢູ່​ໃນ​ມື​ຖື​ຂອງ​ທ່ານ ​ແລະ​ການ​ຊຳລະ​ໄດ້ໃນ​ຮູບ​ແບບ​​ເງິນ​ກີບ, ​ເງິນ​ບາດ ແລະ ເງິນ​ໂດ​ລາ, ​ແຕ່​ຕ້ອງ​ເປັນ​ບັນຊີ​ສະກຸນ​ເງິນ​ດຽວ​ກັນ. ປັດຈຸ​ບັນ​ໜ່ວຍ​ງານ YES Pay ກຳລັງ​ລົງ​ຕິດ​ຕັ້ງ​ QR Code ຕາມ​ຮ້ານ​ຄ້າ, ຮ້ານ​ຊັບ​ພະ​ສິນຄ້າ,​ ເອັມພອຍ​ມາດ, ຮ້ານ​ກາເຟອາ​ເມ​ຊອນ​ຕ່າງໆ ຕາມ​ໂຮງ​​ແຮມ, ຮ້ານອາຫານ ​​​​ແລະ ຫົວໜ່ວຍບໍລິການ​ອື່ນໆ ​ເພື່ອ​ໃຫ້​ລູກ​ຄ້າ​ເຂົ້າ​ເຖິງ ​ແລະ ​ສະດວກ​ສະບາຍ ​ໃນ​ການ​ຊຳລະສະສາງ, ເຊິ່ງຄາດ​ວ່າຈະກະ​ຈາ​ຍ​ໄປ​ທົ່ວ​ປະ​ເທດ​ ພາຍ​ໃນ​ປີ​ນີ້​ໃຫ້ສຳ​ເລັດ.