ທະນາຄານຮ່ວມພັດທະນາ ມະຫາຊົນ (JDB) ເປີດການຊື້-ຂາຍຮຸ້ນ ໃນຕະຫຼາດຫຼັກຊັບລາວ (ຕລຊລ) ຢ່າງເປັນທາງການ ແລະ ມີມູນຄ່າ 9,100 ກີບ/ຮຸ້ນ ທັງເປັນການສະຫຼອງ ຄົບຮອບ 15 ປີ ຂອງການສ້າງຕັ້ງ ຕລຊລ.
ການເປີດການຊື້-ຂາຍຮຸ້ນ ຢ່າງເປັນທາງການ ຈັດຂຶ້ນໃນຕອນເຊົ້າ ວັນທີ 10 ຕຸລາ 2025 ຜ່ານມາ, ໂດຍໃຫ້ກຽດເຂົ້າຮ່ວມຂອງທ່ານ ອາລຸນ ບຸນຍົງ, ຮອງຜູ້ວ່າການ ທະນາຄານແຫ່ງ ສປປ ລາວ; ທ່ານ ເອກະພັນ ພະພິທັກ, ປະທານຜູ້ຖືຮຸ້ນ JDB; ທ່ານ ນາງ ແພງສີ ແພງເມືອງ, ຫົວໜ້າສຳນັກງານຄະນະກໍາມະການຄຸ້ມຄອງຫຼັກຊັບ (ສຄຄຊ); ທ່ານ ສຽວສະຫວາດ ທິລະກຸນ, ຜູ້ອຳນວຍການໃຫຍ່ ຕລຊລ, ທ່ານ ພຸດທະໄຊ ສີວີໄລ ປະທານສະມາຄົມທະນານາຄານລາວ, ທ່ານ ວິໄລ ສີພະພອນ ປະທານສະພາບໍລິຫານ ທະນາຄານຮ່ວມພັດທະນາ ມະຫາຊົນ, ທ່ານ ສາຄອນ ຍໍພັນໄຊ ຜູ້ອໍານວຍການໃຫຍ່ ທະນາຄານຮ່ວມພັດທະນາ ມະຫາຊົນ, ມີບັນດາທ່ານ ຈາກບໍລິສັດຫຼັກຊັບ, ບໍລິສັດຈົດທະບຽນ, ຜູ້ລົງທຶນ ແລະ ບັນດາສື່ມວນຊົນເຂົ້າຮ່ວມ.
ທະນາຄານຮ່ວມພັດທະນາ ມະຫາຊົນ ໄດ້ເປີດການຊື້-ຂາຍຮຸ້ນ ຢ່າງເປັນທາງການ, ພາຍຫຼັງປະສົບຜົນາເລັດໃນການອອກຈໍາໜ່າຍຮຸ້ນ ໃຫ້ແກ່ມວນຊົນຄັ້ງທໍາອິດ (IPO) ຈໍານວນ 75,333,900 ຮຸ້ນ, ລາຄາ 8,800 ກີບ/ຮຸ້ນ ແລະ ສາມາດລະດົມທຶນໄດ້ 656,158,260,000 ກີບ ຫຼື ປະມານ 30 ລ້ານໂດລາສະຫະລັດ. ຫຼ້າສຸດ ການເປີດຂາຍຮຸ້ນຄັ້ງທໍາອິດຂອງ JDB ໃນຕອນເຊົ້າຂອງ ວັນທີ 10 ຕຸລາ 2025 ເຮັດໃຫ້ລາຄາປັບຕົວເພີ່ມຂຶ້ນຢູ່ທີ່ລາຄາ 9,100 ກີບ/ຮຸ້ນ, ສົ່ງຜົນໃຫ້ພາບລວມຂອງທຸລະກິດ ແລະ ຜູ້ຊື້ຮຸ້ນ ມີກໍາໄລເພີ່ມຂຶ້ນຫຼາຍສົມຄວນ.
ທ່ານ ສາຄອນ ຍໍພັນໄຊ, ຜູ້ອໍານວຍການໃຫຍ່ ທະນາຄານຮ່ວມພັດທະນາ ມະຫາຊົນ ກ່າວວ່າ: JDB ເປັນທະນາຄານທຸລະກິດເອກະຊົນ ທີ່ນໍາໜ້າໃນ ສປປ ລາວ. ໄດ້ສໍາເລັດຕໍ່ IPO ທີ່ໄດ້ຂາຍໄປ, ນີ້ແມ່ນການອອກຈໍາໜ່າຍຮຸ້ນທີ່ມີຂະໜາດໃຫຍ່ທີ່ສຸດ ໃນຕະຫຼາດຫຼັກຊັບລາວ ໃນຊ່ວງຫຼາຍປີທີ່ຜ່ານມາ ແລະ ເປັນການສະທ້ອນໃຫ້ເຫັນເຖິງຄວາມໄວ້ວາງໃຈຂອງຕະຫຼາດຕໍ່ JDB ແລະ ທັງເປັນບາດກ້າວໃໝ່ ທີ່ສະແດງໃຫ້ເຫັນເຖິງການເປີດກວ້າງ ແລະ ກ້າວເປັນທັນສະໄໝ ໃນລະດັບໜຶ່ງຂອງລະບົບການເງິນຂອງປະເທດ.
ດ້ານ ທ່ານ ສຽວສະຫວາດ ທິລະກຸນ, ອໍານວຍການໃຫຍ່ ຕະຫຼາດຫຼັກຊັບລາວ (ຕລຊລ) ກ່າວຕື່ມວ່າ: ພາຍຫຼັງ JDB ເຂົ້າຈົດທະບຽນໃນຕະຫຼາດຫຼັກຊັບລາວ ສົ່ງຜົນໃຫ້ປັດຈຸບັນ ຕລຊລ ມີບໍລິສັດ ຈົດທະບຽນເພີ່ມຂຶ້ນລວມທັງໝົດ 12 ບໍລິສັດ. ໃນນັ້ນ, 5 ບໍລິສັດ ແມ່ນສະຖາບັນການເງິນ, ຊຶ່ງປະກອບມີ: 2 ທະນາຄານທຸລະກິດ, 2 ບໍລິສັດເຊົ່າສິນເຊື່ອ ແລະ 1 ບໍລິສັດຫຼັກຊັບ. ສະແດງໃຫ້ເຫັນວ່າ ຕະຫຼາດທຶນ ເປັນແຫຼ່ງສະໜອງທຶນໄລຍະຍາວ ໃຫ້ແກ່ວິສາຫະກິດ ຢ່າງມີຄຸນະພາບ.
ພ້ອມນັ້ນ, ໃນອະນາຄົດ ການລະດົມທຶນຂອງທະນາຄານທຸລະກິດຜ່ານ ຕລຊລ ກໍ່ຈະເປັນການຊ່ວຍສະໜັບສະໜູນ SME ແລະ ໂຄງການການເງິນສີຂຽວ, ພ້ອມທັງຊ່ວຍຊຸກຍູ້ໃຫ້ ສປປ ລາວ ບັນລຸການຫັນປ່ຽນຍຸດທະສາດ ຈາກເສດຖະກິດທີ່ອີງໃສ່ຊັບພະຍາກອນທໍາມະຊາດ ໄປສູ່ເສດຖະກິດຂະຫຍາຍຕົວແບບຍືນຍົງ. ພິເສດໄປກວ່ານັ້ນ, ການເປີດຊື້-ຂາຍຮຸ້ນ ຢ່ເປັນທາງການຂອງທະນາຄານຮ່ວມພັດທະນາ ມະຫາຊົນ ແລະ ຍັງເປັນການສະຫຼອງຄົບຮອບ 15 ປີ ຂອງການສ້າງຕັ້ງຕະຫຼາດຫຼັກຊັບລາວ ຕື່ມອີກ.
ການເດີນທາງ 36 ປີສູ່ທະນາຄານມະຫາຊົນ: ການເປີດການຊື້-ຂາຍຮຸ້ນຢ່າງເປັນທາງການຄັ້ງນີ້ບໍ່ພຽງແຕ່ເນັ້ນເຖິງບົດບາດຂອງ JDB ໃນຖານະຕົວກາງທາງການເງິນເທົ່ານັ້ນ ແຕ່ຍັງສະແດງໃຫ້ເຫັນເຖິງການເດີນທາງອັນຍາວນານ ແລະ ຄວາມສາມາດໃນການປັບຕົວຂອງອົງກອນ ເຊິ່ງເປັນບົດຮຽນອັນສຳຄັນ ສຳລັບທຸກໆທຸລະກິດທີ່ຕ້ອງການເຕີບໂຕແບບຍືນຍົງ, 36 ປີຜ່ານມາ: ຄວາມຍືນຍົງໃນໂລກທຸລະກິດທີ່ປ່ຽນແປງ, ການເຕີບໂຕຂອງ JDB ນັບຕັ້ງແຕ່ການກໍ່ຕັ້ງໃນປີ 1989 ຈົນມາເຖິງການຫັນປ່ຽນມາເປັນ ທະນາຄານມະຫາຊົນ ໃນປີ 2025 ແມ່ນເລື່ອງລາວຂອງການປັບຕົວ ແລະ ການມີວິໄສທັດທີ່ກ້ວາງໄກ.
JDB ໄດ້ຜ່ານການປ່ຽນແປງ ຈາກການເປັນທະນາຄານທີ່ຖືຮຸ້ນໂດຍນັກລົງທຶນໄທໃນປີ 2010 ມາສູ່ການຖືຮຸ້ນໂດຍນັກທຸລະກິດລາວ ໃນປີ 2012, ແລະ ປະຈຸບັນໄດ້ກ້າວໄປສູ່ ທະນາຄານມະຫາຊົນໃນປີ 2025. ນີ້ສະແດງໃຫ້ເຫັນວ່າ ທຸລະກິດທີ່ຍືນຍົງຄືທຸລະກິດທີ່ສາມາດປັບປ່ຽນຮູບແບບ ແລະ ໂຄງສ້າງເພື່ອຕອບສະໜອງຕໍ່ສະພາບແວດລ້ອມ ແລະ ໂອກາດໃໝ່ໆ. ທະນາຄານຮ່ວມພັດທະນາ ເຕີບໃຫຍ່ໄປພ້ອມກັນ
———————–
Call Center: 1499
LINE: @jdbbank
IG: jdbbanklaos
Tiktok : jdbbanklaos
Youtube: jdbbanklaos
